Цхьацца кхоачамбоацараш бахьан долаш, судо бехктокхаме озаргва Йоал йоаха инспектор
Йоалацарча балха инспектор хинна мехкахо судага гӏолла бехктокхаме озаргва. Из хоам «Сердалога» бир ӏаьдала болхлоша.
«Тохкама оагӏон болхлоша белгалдечох, 2021-ча шера тушола бетта Наьсарерча цхьан моттигацара болх чакхбоаккхаш, федеральни оагӏонцара бокъонаш толхаеш гӏалатло нийсъялийтай цо. Тешал дергдола нах боацаш, видеога гӏолла дӏа ца яздеш, чакхдаьккхад цо гӏулакх, хӏаьта каьхаташ тӏа из болх шин сага бӏаргагуш чакхбаьккхаб, ше аьннар оттадаьд царна хьалхара ше кулг яздаь», - дийцар мехкарча прокуратуре.
Бокъо йоацача тайпара оттадаь из каьхат бахьан долаш, мехкарча Россе ФНС соцам баьб, юридически оагӏон паччахьалкхен реестра юкъера цу хӏаман да дӏаваккха, аьнна. Коммерчески моттига бокъонаш толхаеш хилар из.
Магасерча кхален суде тохкаш латт из гӏулакх.
