Гӏалгӏай мехка безбир лораш-ветеранаш, боахама дикагӏа бола болхлой
Гӏалгӏай мехка лаьрххӏа йола кхетаче дӏайихьар, из хетаяь яр лорий болхлой Денна. Цӏайна хетаяь кхетаче дӏахьош, вӏашагӏкхийтар лораш, лорий йижарий, фельдшераш, мехка унахцӏенон ветеранаш. Уж ба хӏара дийнахьа республикан бахархой могашал лораеш латтараш. Царца из цӏай декъа баьхкар Гӏалгӏай Республикан Паччахьалкхен Председатела гӏонча Мутаӏаланаькъан Хьажбикар, Росздравнадзора, ФОМС викалаш, иштта республикан Юкъарча палатан, лорий болхлой, Сбербанка моттигерча филиала викалаш.
«Цига даькъалабийцар цу боахама дикагӏа бола говзанчаш. Шоай болх дика бовзаш, из тешшаме дӏахьош, мехка унахцӏено дегӏайоалаеш волча 66 сага Гӏалгӏайчен Кулгалхочун грамоташ елар», - аьлар «Сердало» газетага республикан унахцӏено лораяра Министерстве.
Лаьрххӏа терко йир лорий ветеранашта, цар дукхача шерашка баь болх тахан кагирхошта дика масал да. Къонача лораша доаккхалца тӏаэц из мах варгвоаца ганз, дӏахо лорий болх дегӏабоалабеш къахьег.
