Даьхен гӏулакхе латтача денал долча къонгашта баркал кхайкадир мехко
Даьхен лорабой Ди дездеча дийнахьа майралца, деналца шоай гӏулакх дӏахьош болча къонгашта баркал кхайкадеш хилар мехкарча юрташка, шахьарашка. Из хоам «Сердалога» бера цу моттигера.
«Тахан вай белгалбераш ба, герз бедоаллаш Даьхен хӏама лорадеш, кхерамзлен хьал хьаллацара тӏехьа къахьегараш. Гӏалгӏайчен къонгаш массахана лаьттаб Россе гӏулакха шоаех дика цӏи йоаккхийташ, дизза декхараш кхоачашдеш.
Тахан а дӏахо дӏахьош ба из никъ вай къаман къонгаша, шоай даьй ӏадаташ лорадеш. Тӏехьа тӏабоагӏарашта масал дола гӏулакхаш гойташ, деналца цӏихеза болаш, шоай моттиг лораеш ба уж», - язду Наьсарен кхален администраце ший Телеграм-оагӏон тӏа.
Республикерча массайолча моттигашка дӏайихьар цу оагӏонцара кхетаченаш. Цу дийнахьа вай бӏаргашта духьалъотт, цхьаккха бехк боацаш, гӏалгӏай къам хийрача, гаьнарча Казахстане, Юкъерча Азе моттигашка ӏодахьийтар.
Из унзара, хала ди вай къаман исторе ӏаьржа боад хинна чӏоагӏденна латт, вай дегаша цӏаккха а дицдергдоаца хӏама да из! Республикерча тайп-тайпарча дешара моттигашка Денала урокаш дӏайихьар.
Къонабарашта дийцар Даьхен сийдолча къонгех, турпалех. Шоай декхараш дизза кхоачашдеш латтача къаман къонгашта доккха баркал кхайкадир цу дийнахьа.
