«Хьалхарбарий болама» 250 юххьанцара моттиг я, вай мехка болх дӏахьош
Вай мехкадас Келаматанаькъан Махьмуд-ӏаьлас кулгал деш, «Хьалхарчар болама» гӏулакхех йола кхетаче дӏаяхьа гулбелар Магасе. «Кхетачено белгалдир, таханарча дийнахьа вай мехкара 50 эзар совгӏа бераш да «Хьалхарбарий болам» яхача оагӏонца къахьегаш, шоай начӏал, говзал йоаржаеш, юкъарча балхашта юкъе дакъа лоацаш, бехктокхаме, толамца моллагӏа шоашта тӏадилла гӏулакх дӏадахьа ӏомалуш.
«Хьалхарбарий Болама» 250 моттиг я тахан республике , берий бешамаш а я цу юкъе. Вай мехкара студенташ, иштта дешархой гӏо эшача моттигашка новкъостал деш, ӏилман оагӏонцарча яхьашка, олимпиадашка дакъа лоацаш, Даьхенцарча безамах, лерхӏмах йола проекташ йоаржаеш къахьегаш ба. «Зарница 2.0» яхача ловзара юкъе, «Хьалхарбарий ха» яхача «профильни смене», дешара, кхоллама проекташка духхьала укх шера дакъа лоацаш хиннараш эзар совгӏа къонабараш бар», - йоах тхога бенача хоамо.
«Къаьстта хьоахаде дезаш да, вай дешархоша ерригача Россе яхьашка дакъа лоацаш, толамаш доахаш хилар, шоай проекташ йоаржаяр. Дега чӏоагӏа тоам беш да, вай къонабараша хьакхелла проекташ федеральни оагӏонца белгалъеш, кагирхой вахарера лоархӏамедараш кхоачашдара балха юкъе хилар», - дийцар вай мехкадас Келаматанаькъан Махьмуд-ӏаьлас.
Вай республикан кулгалхочо теркалдечох, берашта нийсагӏа бола никъ хьехаш, вахаре царна пайданегӏа хургдолча хӏаман тӏехьа уж чӏоагӏбеш бола болх лоархӏаме моттиг дӏалоацаш ба тахан. Цунга хьежжа, къонабарашта юкъерча хӏаране ший никъ хьахаржа, кхетам лакхбе, кхоана дӏабахьа безача балхацара говзал ӏомае аьттув хургболаш къахьегаш ба тахан мехка.
«Хьалхарчар болам» яха оагӏув вай кагирхошта боккха аьттув луш, начӏал доаржадайташ, тоабанца болх дӏабахьа ӏомабеш болгах дог тийша ва со. Вай декхар – цар оагӏув хьаллацар, къонабараш нийсача наькъ тӏа бахар тахан, гӏо дар. Таханара дешархой, студенташ ба вай къа тахан ман кхоанен хӏама тоаде дезараш, вай декхарийла да цу наькъ тӏа царна новкъостал деш хила», - белгалдир Мехкадас.
