СВО бӏухочун наьна могашал тоае гӏо дир «Даьхен лорабой» яхача ганзо
Тӏема аренашка декхараш кхоачашдеш лелача бӏухой даьшта, ноаношта терко лоаттаеш; санаторе баха салаӏа, шоай могашал меттаоттае аьттув хургболаш, хьожаш ба «Даьхен лорабой» яхача ганза болхлой. Цига болх беш йолча Беканаькъан Мадинас бӏухочун нанна Леймой Радимхана гӏо дир Пятигорскерча Россе ФГБУ СКФНКЦ ФМБА клинике ший унахцӏено меттаоттаеш ха яккха.
«Цу гӏулакха эшаш дола каьхаташ кийчдеш, лорашка чакхйоалаш, иштта кхыдола цига дӏаяхале де деза гӏулакхаш кхоачашдеш, новкъостал дир бӏухочун нанна. Белгалде деза, Пятигорскера из курорт дика лоархӏаш, массехк тайпара дарба деш йолга. Ший дегӏага салаӏийта, низах чӏоагӏенна цӏайоагӏаргья бӏухочун нана, йилла ха яьккха», - дийцар «Сердалога» «Даьхен лорабой» яхача ганза болхлоша.
Маьцхали бетта хьалхарча деношка дӏадолалургда Леймой Радимхана дарба. Лакха говзал йола лораш ба, цига цунга хьожаш хургбараш.
