Тӏема аренашка вахар хаьдача бӏухочун цӏен-нанна гӏо дергда «Даьхен лорбой» яхача ганзо
Тӏема аренашка вахар хаьдача Буружанаькъан Мусай цӏен-нана хулаш йола Буружанаькъан Аьсет «Даьхен лорбой» яхача ганза болхлошкара гӏо дехаш яр. Дегӏа могашал, цӏаьхха, эшаенна хиларах; ма хулла сихагӏа дарба дӏадоладе дезаш яр из. Ганза мехкарча филиала болхлоша, сиха оарцагӏбаьнна, эшаш мел дола каьхаташ гулдаь, Жӏайрахьа кхален дарбанче ӏоюжайир из.
«Даьхен лорабой» яхача ганза мехкарча филиала болхло Чиймарзанаькъан Марем тӏахьожам беш я цу гӏулакха. Дарбанче дӏаяхале лорашка гӏолла чакхйоалаш, эшаш долча каьхаташта кийчо еш, новкъостал дир цо. Тӏема аренашка вахар хаьдача бӏухой цӏагӏарча наха гӏо дар керттерча декхарех да тахан. Боккхача эшамо гӏайгӏанга бига, халача хьале этта бола бӏухой цӏен-ноаной йоккха терко эшаш ба тахан.
Цар дог хьастар, низ дӏа ма кхоачча гӏо дар вай лоархӏаме декхар да», - аьлар ганза болхлоша «Сердалонна» интервью луш. Жӏайрахьа кхален дарбанчера лораш могачох Аьсета могашал меттаоттае хьожаш ба тахан. Турпала дезалца бувзаме болаш, фу эш хоатташ ба ганза болхлой.
