Гӏалгӏай мехкарча ФСБ, полице гучадаьккхар; бокъо йоацаш кхыча мехкара нах лелабеш хилар
Миграционни гӏулакха болхлоша, Гӏалгӏайчен МВД экстремизма духьале еча Центро, мехка УФСБ цхьана юхатехар бокъо йоацаш кхыча мехкара нах лелабеш хилар. Хьем боаццаш лахара болх дӏахьош, гучадаьлар 45 шу даьннача моттигерча вахархочо, арахьара нах тӏа а эцаш, уж бокъонах доацаш республике лелабеш хилар. «Сердало» газетага из дийцар Гӏалгӏайчен МВД зарбан болх лелабераша.
«Полице, кхерамзлен органаша яхачох, цу сага 2026 шера бекарга-маьцхали бетташка кхыча мехкарча 18 сагаца къайлагӏа къахьегама чӏоагӏо йир, уж бар Наьсарен даькъ тӏа балхаш де дезаш. Бакъда кхыча мехкара нах къахьегаш бар республикан тайп-тайпарча доал дара даькъ тӏарча гӏишлоний моттигашка. Гӏалгӏай Республике гӏолла йолча Россе тохкама комитета, Наьсарен кхаленна тохкама урхаллен отдело цунна цунца дакъа лоацаш хиннача сага а духьалара гӏулакх хьадийллар пункт «а» дакъа 2 статья 322.1 РФ УК (хьалххе а вӏашагӏделла, бокъо йоацаш, кхыча мехкара нах лелабар)», - аьлар тхоца къамаьл даьчо.
Лоткъам эцара болх чакхбаллалца, из мехкара аравала йиш йолаш вац. Цунна бокъо луц, ӏаьдала пурам доацаш, цхьаннахьа ваха; цул совгӏа, ше тӏавийхача, ший ханнахьа лоткъам дӏахьош болча хьава везаш а ва из.
