Гӏалгӏайче кхетаче дӏаяхьа кийчлуш ба, терроризмаца къовсам лоаттабара цхьоагӏон Ди долаш
Гӏалгӏайчен Паччахьалкхено дийцар, дагалоаттама кхетаче дӏаяхьара кийчо е езилга, из дӏахьу терроризмаца къовсам лоаттабара Ди хьаллоацаш. Из ди хӏара шера белгалду, Россе тов бетта 3-ча дийнахьа Берса-Юрта нийсденна хатар дагадохаш. Доклад ешаш вар арахьарча бувзама, къаман политикан, зарбан, хоамий министр Мизенаькъан Руслан.
«Республике дӏаяхьа лаьрхӏад 110 гаргга кхетаче. Программа чудоагӏаш да республикан кулгалхоша, бокъонаш лораяра викалаша дакъа а лоацаш, дагалоаттам болча дийнахьа зизаш ӏодахкар. Дукхагӏа бола болх хетабаь ба берашта, кагирхошта. Ишколашка, колледжашка, вузашка йийлла урокаш дӏахьоргья, иштта хургья денала урокаш, классера сахьаташ, берашта юкъе яхьаш дӏаяхьар, хьаькъале ловзараш, кхоллама къовсамаш. Книжкай гойтам кийчбергба, лекцеш ешаргья, бокъонаш лораерий дин викалашца вӏашагӏкхетар хургда. Дагалоаттама кхетаченаш дӏахьош хургья тематически сайренаш, концерта программаш, говзанч-классаш, «Дагалоаттама кӏерам» яха болам. Берашта, кагирхошта кийчъяьй спортивни яхьаш, футболаш, шахматаш», - аьлар «Сердало» газетага региона Паччахьалкхене.
Юххера а, зизаш доахкаргда Коталон Парке йоагача цӏера гонахьа. Цига дакъа лоацаш хургва Гӏалгӏай Республикан кулгалхо Келаматанаькъан Махьмуд-Ӏаьла.
