Полиомиелит яхача лазара духьала берашта маьхий тоха кийчлуш ба мехка
Кхаь беттагара дийтта шерга кхаччалца долча берашта полиомиелит яхача лазара духьала маьхий тохаш бола болх дӀаболабе кийчлуш ба республикера лораш.
Из хоам «Сердалога» бир Минздраво. Цо белгалдечох, ханнахьа маьхий тохаро из хала лоархӀаш дола лазар даржийтац. Цунга хьежжа, цу хӀаман нийса уйла еш, шоай берий кхоане дагалаьце, маьхий д1атохийтар дех лораша берий ноаношка.
«Полиомиелит яхар чӀоагӀа кхераме лоархӀаш вирус да. Из кхийтта бер, дегӀа маьженаш дӀалаьца, дӀа ца лелалуш диса йиш я, иштта цу вирусах вахар хаьда а моттигаш я.
Нервашта зе деш, когаш дӀа ца лелача кхоачавийя, заӀапхо хьаву цу вируса сагах. Таханарча дийнахьа дарба дулуш лазар дац из, цудухьа чӀоагӀа лоархӀаме да из хьакхетаргдоацаш ханнахьа маьхий тохар. Цу гӀулакхо бера дегӀа лазара духьалъотта, из хьатӀа ца лаца низ лу. Берригача мехка дӀахьош, лоархӀаме болх ба из тахан», - дийцар Минздрава болхлоша.
