Гӏалгӏай мехка кийчлуш ба электричество лоаттаер хувцаваларга
Гӏалгӏайчен Паччахьалкхен кулгалхочо Сластенин Владимира дийцар «Ставропольэнергосбыт» ПАО викалашца, республике электиричество лоаттаергйолаш кхыча моттига уж бокъонаш дӏаяларах. Из хаттар дувцача дакъа лоацаш хилар «Ингушэнергосбыт» моттигерча филиала кулгалхо Хамхой Башир, ставропольски компане паччахьалкхен органашца бувзам лелабу Федотов Владимир.
«Карарча шера кӏимарса бетта 1-ча дийнахьа денз, «Ставропольэнергосбыт» ПАО бокъо йолаш я Гӏалгӏайчен даькъ тӏа тешшаме болх беш хила. 2026 шера аьтинга бетта 10-ча дийнахьа №10 1427 йолча цу амара кулг яздаьд. Компане электроэнерги хьаийергья оптови базаргара, из лоаттаергья наха, цох бола мах хьагулбара хьал а вӏашагӏдолларгда.
Хьалхарча аргӏагӏа юридически нахаца, цу юкъе организацеш а йолаш, бартчӏоагӏама компанеш хургья из болх дӏахьош. Из болх дӏаболабергба ши бутт баьлча, из мишта вӏашагӏбеллача бакъахьа да а дийцар, кхетаче дӏахьош. Къаьстта дийцар юридически нахага, мехка СМИ гӏолла бартчӏоагӏама компане болх бовзийта безарах», - аьлар «Сердало» газетага моттигерча Паччахьалкхене.
Гӏалгӏайчен ӏаьдала декхар да, электроэнерги лоаттаеш бола болх хувцалуш хиларца, деррига из хьал дика вӏашагӏдоллар, маьхашца дувзаденна гӏулакх къоастадар, тешшаме хӏара сага электричество лоаттаяр.
