Берий могашал меттаоттаеш йолча моттига лаьрхӏа, гӏишло хьалъе кийчлуш ба мехка
Эбарга-Юрта берий могашал меттаоттаеш йола керда гӏишло хьалъе лерхӏаш ба мехка. Из хоам «Сердалога» бир мехкадаь зарбан болх лелабераша.
«Из проект дӏахьекхаяр РФ вице-премьер йолча Голикова Татьянайга. Белгалде деза, тахан вай мехка болх беш йола моттиг 50 бера лаьрхӏа мара йоацилга, хӏаьта цига ха яккха езаш дараш 300-350 совгӏа бер да. Эггара хьалхарча аргӏанца гӏо ду геттара чӏоагӏа могаш доацача берашта, бакъда беррига унахой тӏаэца, боаггӏача боараме царга хьажа тахан аьттув балац. Из гӏулакх меттадоаладе деза!» - аьлар вай мехкадас Келаматанаькъан Махьмуд-ӏаьлас цу оагӏонца дувзаденнача кхоачамбоацарех дувцаш. 1,5 млрд сом ахча да цу проекто дӏалоацар. Федеральни моттиге дӏадахьийтад каьхаташ, цар тохкам бергболаш.
Республикан кулгалхоша сатувс федеральни оагӏонцара ахча 2026-ча шера хьакхачарга, иштта хилча, болх 2027-ча шера дӏаболабе йиш хургьяр. Вай Мехкадас белгалдечох, боаггӏача боараме тоаяь йоккха моттиг хургья из. Дегӏа маьженашца, неврологически, ментальни лазараш дола дукха бераш тӏаэца, боаггӏача боараме царга хьажа йиш хургья цу чу. ЛФК залаш, логопедий, дефектологий, психологий кабинеташ, тайп-тайпара блокаш хургья цига, шоай ноаношца паргӏатта ха йоаккхаш дегӏа могашал меттаоттае аьттув хургба берий. «Тахан чӏоагӏа чоалхане латт из гӏулакх: моттигаш таац, аргӏа хьакхачарга хьежаш латтараш хӏара денна дукхагӏа ба, дезалаш шоай халонашца цхьаь бус», - белгалдир Мехкадас.
Иштта цу проекта юкъе да метта дадаш, вордингаш чу дагӏаш долча берашта дарба де эшаш дар хилийтар, сенсорни моттигаш, геттара хала ДЦП долча берашта, генетически, аутистически лоархӏаш дола лазараш дарашта лаьрхӏа кабинеташ хургья. Из проект чакхъяккхар чӏоагӏа лоархӏаме да вай мехкарча дуккхача дезалашта, хам баь, мах баь варгвоаца доккха дика да из.
