«Коталонга иллеца кхаьчар тхо» яхача фестивалага кийчо еш ба вай мехка
Хьатӏадоагӏача ерача дийнахьа йоккха культуран оагӏонцара кхетаче дӏахьоргья вай мехка. Пхьилекъонгий-Юртарча культуран Цӏагӏа «Коталонга иллеца кхаьчар тхо» яха йоккха Республикански фестиваль дӏахьоргья. Сийлахь-боккхача Даьймехка тӏема Котало яьккха 81 шу дизара хетаяь я из лоархӏаме кхетаче.
«Кхоллама яхьаш хиларал совгӏа, ноахала юкъера дийна бола бувзам ба ала йиш я цох. Тӏема исторех дувцаш, поэтически мугӏараш дешаш дӏахьоргья из лоархӏаме кхетаче. Тӏема шерашца дувзаденнар массахана йоккха терко лоаттаяьрех да.
Даьхе езаш, цун хӏама лорадеш, моастагӏа лира тохаш вай лаьтташкара аравоаккхаш, лаьттарий турпала наькъах дувцаш да тӏемах дола иллеш», - дийцар «Сердалога» къаман кхоллама Цӏен кулгал деча Зурабанаькъан Ахьмада.
Пхьилекъонгий-Юртарча ДК цӏихеза артисташ санна, иштта къонабараш а хургба. Мехка эггара халагӏа хиннача деношка кхолладенна иллеш хозаргда цу дийнахьа цига гулбеннарашта.
Фестивалага гӏолла белгалду, вай хӏаман доал де отта гӏийртача бӏехача фашиста тӏема аренашка духьаллаьттарий цӏераш вай дегашта цӏаккха а йицъяла йиш йоацилга. Фестиваль кийчъяьраша беррига бахархой бех цига дакъа лаца.
