Шолжа-Шахьар – Горагорск - МагIалбик яха никъ тоабеш латт
Шолжа-Шахьар-Горагорск-МагIалбик яха 22,6 км бIаьха никъ тоабеш латт наькъашкарча хьалах йолча Министерствос, юрташкара моттигаш тоаярах йолча паччахьалкхен программага гIолла. Из хоам «Сердалога» бир министерствера.
Юххьанца шин даькъа йийкъар из проект. Укх шера дIахьоргболча балха юкъе тоабергба 10 км никъ, хьатIадоагIача шера 12,6 км никъ тоабергба. Асфальтабетона никъ Iобилла, кIалхара кIийле тоаеш, нийсъеш боахк болхлой.
«КIалха билла никъ 8 см болаш, лакхе буллар 5 см кхоачаш, болх дIахьоргба цига. Наькъа йистош нийсъеш, керда гIармаш оттаеш, басарашца наькъашта юкъе белгало еш болх бергба цига. Белгалде деза, из тоабар мехка чIоагIа лоархIаме долга. Дукха машинаш лелаш, массехк моттиг хотташ никъ ба из. Наькъашкара хьал дикка аттачахьа даргда, из болх йистебаьлча», - аьлар министерстве.
Ер шу йистедалалехь, 70 км никъ тоабе лаьрхIа ба вай республике.
