Гӏалгӏай мехка ӏаьржа хий деначара араваьккхар 75 саг, цу юкъе 30 бер да
Гӏалгӏайче массайолча оагӏорахьара оарцагӏбаьнна болх дӏахьош ба, «Лакха кийчо хилар» яхача боарамах. Дӏадахача ден-бус 18:00 сахьат доалаш 75 саг кӏалхарваккха везаш хилар, цу юкъе 30 бер а долаш. Дӏа-юха лелалуш боаца нах царна юкъе бац. Цигара кӏалхарбаьха нах шоай гаргара нах болча дӏа-юха бахаб хӏанзарчоа. Наха ӏаьдало чуӏе моттиг ӏалашъеча уж баха раьза хиланзар, яхаш, дийцар «Сердало» газетага Гӏалгӏайчен Паччахьалкхене.
Керттера низ вӏашагӏбеллар Гӏалгӏайче гӏолла йолча Россе МЧС Керттерча урхаллено Шолжа кхален Эбарга-Юрта. Йоккхий тоабаш я хий чудаьннача моттигашка болх беш. Нах кӏалхарбоахараша дӏахьу коашка гӏолла хьожаш болх.
Даим теркама юкъе да Шолжа хий, айлуш дий хьожаш. Хӏанз укх сахьате хий 270 см лакхденнад. Из хьал аттача доалаш хилар хоалуш да, тӏеххьарча сахьата 10 см хин боарам лохбеннаб.
Цу моттигера кхераме хий лакхдалара боарам 300 см я. Унзара - 340 см.
Нагахьа санна из хьал талхаш хуле, нах тӏаэца кийча ба Шолжа-Шахьаре, Илдарха-Гӏалий тӏа, иштта Шолжа, Жӏайрахьа кхалений моттигашка. Эбарга-Юрта нах тӏаэцара пункт я №2 йолча юкъерча ишкола даькъ тӏа Марзиева урамах, 44/1. Цига 500 саг гаргга чуэца таро я. Иштта йоаржаяьй моттигерча администраце наха лаьрхӏа моттиг.
Тахан цига болх беш я 28 техника, 104 саг. Царех Россе МЧСа цу моттигашка болх беш ва 63 саг, 14 техника. Из хьал даим лаьрххӏача болхлой теркама юкъе да.
