Газ дӏатӏаяхьа 100 эзар сом дала йиш я льготаш ярашта
Гӏалгӏайчен бахархой таро я паччахьалкхенгара 100 эзар сомага кхаччалца ахча эца, шоай цӏеношта газ дӏатӏаяхьийтар духьа, яхаш, дийцар, «Сердало» газетага республикан Паччахьалкхено.
Тхоца къамаьл даьчо ма аллара, республике дӏахо дӏахьош я, шоай фусамашта газ дӏатӏахьош дӏадодар меттаоттадара новкъостал деш йола программа, из лаьрхӏа я бахархой массайолча оагӏорахьа хьаллацара. Ахчанца новкъостал деш хиларах, таро я, газ чуюллаш, шоай лаьтта доазон тӏа балхаш дӏахьош, цӏагӏа лоаттаду гӏирсаш - котёл, пишк, счётчик эцаш дӏадодар бӏарчча е ах меттаоттаде.
Уж таронаш лелае йиш ярех ба льготаш йоагӏаш бола бахархой, царех ба Сийлахь-боккхача тӏема доакъашхой, тӏема ветеранаш, лаьрххӏача тӏема операце доакъашхой, таро во яраш, иштта 1-ча тоаба заӏапхой, бераш-заӏапхой кхоабаш бола дезал. Дӏадахача ахчанга хьежжа луш да 100 эзар сом, из да цхьан цӏенна лаьрхӏа.
Из хьал шоашта новкъостала юкъедаккхара дехар дӏадала деза Гӏалгӏайчен вахара-коммунальни боахама, энергетикан Министерстве. Из де йиш я «Са каьхаташ» яхача дукхача оагӏорахьара болх лелабеча даькъага гӏолла, ше тӏавоацаш а, «Госуслуги» яхача цаӏ йолча портала йоазонга гӏолла а.