Ветераний Цӏагӏа салаӏа гӏоргйолаш, новкъостал дир СВО доакъашхочун нанна
СВО доакъашхошта, иштта цар дезалашта эшачунга хьожаш, цар хьашташ кхоачашдеш болх лоаттабу «Даьхен лорабой» яхача ганза болхлоша. Шолжа-Шахьарерча цу оагӏонцарча филиала болхло Элмарзанаькъан Амина бӏухочун наьна дехарга хьожаш хилар укх наькъа. Ветераний Цӏагӏа ший дегӏа могашал меттаоттае аьттув хургболаш, гӏо дир Маларой Мадинайна.
«Цар дезал хьалхара чулуш бац ганза филиале дехар. Дӏадахача шера Сурхо тӏарча ветераний Цӏагӏа ха йоаккхаш хилар бӏухочун Маларой Махьмуда нана, хӏаьта укх шера юха а цига яха, ший дегӏа могашал меттаоттае ловш хилар из. Ганза филиала болхлоша эшаш дола каьхаташ вӏаштӏехьдаьха цига дарба де дӏахьожайир из», - дийцар «Сердалога» цу моттигера.
«Даьхен лорабой» яхача ганза республикерча филиала хьалхашка латта керттера декхар да цу наха терко еш хилар. Тахан деналца, майралца тӏема аренашка шоай декхараш токхаш латтача наьха, иштта цар дезалий хьашташ кхоачашдеш хила деза вай. Царна гӏо де, уж тӏаэца массахана кийча ба цига.
