Гӏалгӏайче лорий болхло бехке ву ахчанца тийшаболх лелабарах
Гӏалгӏай мехка лорий урхаллен болхло бехке ю вахара хьаллоацаш луш долча ахчанца тийшаболх лелабарах. Цунна духьала хьадийллад РФ УК 5 д. 33 ст., иштта РФ УК 4 д. 159.2 ст. дола уголовни гӏулакх, Республикански къаьстта лоархӏаме гӏулакхаш тохкаш йолча комитето.
«Из болх дӏахьош белгалдир, Республикан цхьан лорий урхаллен отдела кулгалхочо, 2020 шера кӏимарса бетта денз 2021 шера маьцхали беттага кхаччалца, стационаре дарба деш вола саг керта човнаш яь ва, аьнна, лорий карта тӏа харцахьара йоазув дир. Из каьхат хилар бахьан долаш, республикан бокъонаш лораяра болхло ший балха декхараш кхоачашде йиш йолаш вац, аьнна, цун сиха, кхы тӏехьагӏа чакхвувла ца везаш, шоллагӏча тоаба заӏапхо ва аьнна чӏоагӏдир. Цу тайпара болхлочо ца доагӏаш вахара гӏонна лу ахча хьаийцад 7 млн сом», - аьлар «Сердало» газетага Гӏалгӏайчен тохкама Комитете.
Цу кхалсага кхел еш хилар хьакхайкадаьд, цунца цхьана ва хинна бокъонаш лораяра даькъ тӏара болхло а, цунна духьала а гӏулакх хьадийллар цо социальни ахча лочкъадара харцахьара хоамаш юкъедахарах.
Из гӏулакх хьадийллар Гӏалгӏайчен УФСБ кийчдаьча каьхаташка хьежжа. Карарча хана Тохкама комитет тешал гулдеш я, из зулам хьадоагӏа моттиг тохкаш.
