Гӏалгӏайче боккхача дезала доагӏаш дола берий ахча хьаделар
Гӏалгӏайчен сага бокъон викал ера диъ бера (царех цаӏ заӏапхо) нана. Бокъо йоацаш, бера доагӏаш дола цкъара луш дола пособи соцадар бахьан долаш. Вахара ганзо дехар юхаделар наджгоанцхой бетта; даьна-нанна хьатӏабоагӏа пайда кӏезига хилара тешал деш дола каьхат юкъе дац, аьнна. Бакъда нана берага-заӏапхочунга хьожаш я, дукхача дезала да хиларах тарра «пайда кӏезига хьатӏабоагӏаш» ва да. Деррига бахьан, тайпан цӏи язъеча хана, совлен нийсденна цхьа алап хилар. Тӏехьагӏа из гӏалат нийсдаь хиннадале а, цу кхалсага ахча хьадала раьза хиланзар СФР.
«Цу боккхача дезала новкъостал де дегахьа, сага бокъонех волча викала Россе вахара ганзе хоаттам бир. Цига гучадаьлар, юххьанца каьхаташ нийса чуденна цахилар бахьан долаш, из ахча соцадаь лаьтталга. СФР тӏахьожама болх дӏабихьачул тӏехьагӏа, цу кхалсага бер заӏапхо хилар дӏа а лоархӏаш, цун из ахча хьа доладир», - аьлар «Сердало» газетага ГӏР УПЧ хоамий-аналитически даькъ тӏа.
Тхоца къамаьл даьчо яхачох, цу дезалерча массанена цаӏ дола пособи хьадоладир. Из да бетта 17 269 сом хӏара бера. Дӏабахача ялх бетта соцадаь лаьтта 414 456 сом деррига наьна банка чота тӏа хьатӏадалийтар.
