Гӏалгӏайчен кагирхой центраш хьакхоллара миллионаш ахча хьожадергда
Гӏалгайченна федеральни оагӏорахьара новкъостал дир 200 млн сома кагирхой доазув дегӏадоаладеча, яхаш, дийцар «Сердало» газетага ГӏР Кулгалхочун зарбан болх лелабераша.
Из деррига вӏаштӏехьдаьлар вай мехка, «Росси - тароний мохк» яхача проекте дика толам баккхарах.
«Яхье котало яккхар - из да вай дика къахьийга хилар а, иштта федеральни боарам тӏа вай хьаллоацаш хилар а. Цу гӏулакха хьаелларгья йиъ центр: Наьсаре дукха хьалаш чудоагӏаш йола центр, Шолже - Осканаькъан Сулумбика цӏерагӏа патриотически центр, Дошлакъий-Юрта «Кулгаговзала парк» яха кхоллама центр, иштта Жӏайрахье хьаьша тӏаэцара центр», - аьлар республикан кулгалхочо Келаматанаькъан Махьмуд-ӏаьлас.
Дукхача кагирхой таро хургья шоашта ховш дар доаржаде, из вахара юкъедаккха, культура ӏадаташ совдаха, чура туризм дика дегӏайоалае, иштта вай хьаькъал долча тӏехьен Даьхенцара безам чӏоагӏбе.
Ахчан цхьа дакъа дӏадохийтаргда культуран, дешара кхетаченашта; иштта кагирхоша ерригача гулламашка дакъа лацара.
