Россе МЧС 35 шу дизара хетаяь, Маьтлоам тIа байракх йоаржайир
30.10.2025 11:49
Шоаш къахьегача оагIон 35 шу дизар, Маьтлоам тIа баьнна, дездир мехкарча Россе МЧС ГУ болхлоша. Из хоам «Сердалога» бир министерствон зарбан болх лелабераша.
3003 метр лакха болча лоам тIа баьнна, Россе МЧС байракх йоаржайир вай мехкарча цу оагIонцарча болхлоша, «Эндуро-ГIалгIайче» яхача мотоклуба доакъашхошца.
«Тхоай дегIа низ, хьал техкар оаха. Кадай, дегIаца низ болаш, моллагIча халон духьалъотта могаш хилар тха балхаца лоархIаме да. Из атта боаца болх дIахьош мел латтараш хьаллоацаш, йоаржаяьй оаха из байракх цу бухье», - дийцар кадрови, психологически гIулакхех болча оагIон кулгал деча Колой Мусас.
Белгалде деза, МЧС болхлой «Эндуро-ГIалгIайче» яхача клуба доакъашхой болга, шоай балхацара говзал дикка лакхъеш къахьег цар тахан.
