Полиомиелита духьала дӀахо а маьхий тохаш ба мехка
Укх бетта 11-ча денга кхаччалца полиомиелит яхача лазара духьала маьхий тохаш хургба республике. Эггара кхерамегӀа лоархӀаш долча вирусни лазара духьала из болх дӀабахьар, берий унахцӀено ма хулла лораяр да.
«Сердалога» из хоам бу унахцӀенон гӀулакхех йолча министерствос. Маьхий тохара болх дӀахьоргба берий дарбанчешка, берий бешамашка, ишколашка. Кхаь беттагара 15 шерга кхаччалца дола бераш да цу юкъедолхараш.
Лораша белгалдечох, эггара чӀоагӀагӀа цу вирусах лораде дезараш зӀамагӀа дола бераш да, хӀаьта из лазар геттара хала долга вайна массанена ховш да.
«Дерригача дунен тӀа дӀахьош болча балхо хьагойт, хан-ханнахьа маьхий тохаро из соцадергхилар, бакъда из болх дӀахьош цахиларо вирус доаржаде кхерам ба. Цудухьа даьшка, ноаношка кхайкарал ду, боккъал а ханнахьа маьхий тохийта шоай берашта!» - белгалдир министерстве.
