«Тӏаьск» яха Москван юхера театр да вай мехка кхаьча
«Тӏаьск» яха Жуковски муниципальни драматически театр да вай мехка дена. Россе культуран гӏулакхех йолча Министерствон хьалхаленца РОСКОНЦЕРТА йоаржаеш Ерригача Россе йоккха проект я из. Хьалхарча ден программа хьайийллар «Теремок» яхача спектаклаца-ловзарца. Режиссёр, Россе культуран лоархӏаме болхло йола Ступина Наталья я цу тӏа къахьийгар. Зӏамига хьажархой спектаклага хьажарал совгӏа, шоаш а цу юкъе дакъа лоацаш хилар. Спектакль йистеяьнначул тӏехьагӏа, пресс-конференци дӏайихьар театра доазон тӏа.
«Цига гулбенна бар вай мехкарча культуран гӏулакхех йолча Министерствон викалаш: министра гӏонча Куртой Макка, «Тӏаьск» театра исбахьален кулгалхо Золкин Сергей, актёраш, ТЮЗа кулгалхо Хазанаькъан Муса. Мехкарча культуран гӏулакхех йолча министерствон хьалха латтача Лаьнанаькъан Залинайгара совгӏаташ делар хьаьшашта Куртой Маккас. Цо белгалдир, иштта йола кхетаченаш тахан лоархӏаме йолга. Хӏаьта Золкин Сергейс баркал оалаш каьхат хьаделар ТЮЗа болхлошка. Цхьана дӏаэтта сурташ даьхар гулбенна хиннараша. Массане дог гӏоздоалаш, ди хилар цох», - «Сердало» газетага из хоам бера ТЮЗа зарбан болх лелаберашкара.
Жуковски театр вай мехка кхачарах совгӏат хинна бар боккхийбараш, бераш. Бакъда, из юхьиг мара яц, доккхача культуран оагӏонцарча цӏайна. Тов бетта 23-ча денгара 24-ча денга кхаччалца, тайп-тайпара спектаклаш хургья ТЮЗе хьокхаш. «Моза - Цокотуха» яхача фаьлгах спектакль хьокхаргья берашта. Дикало къизал эшаяр мишта хул гургда берашта, Чуковски Корнея кхоллам бовзаш.
Боккхийбарашта, кагирхошта кӏоарга чулоацам болаш я «Дайна синош» яха спектакль. Массайолча хана даьржа дола хӏамаш довзийташ ба Гоголь Николайс язбаь из болх.
