Коммерчески лоархӏаш йоацача моттигашкара гранташта дехараш чуэца болабеннаб
НКО грантови яхьашта лаьрхӏа дехараш чуийдеш ба мехкарча Миннаце. Моттигерча Паччахьалкхено № 49 2021-ча шерарча бекарга бетта 27-ча дийнахьа яьча чӏоагӏонца дӏахьош я яхьаш. Дехар чудала йиш йолаш я республике боаггӏача боараме шоай хӏама чӏоагӏдаь йола коммерчески йоаца моттигаш. Паччахьалкхен, муниципальни моттигаш яц цу юкъе.
«Грантий ганз 10 миллион ахчанга кхоачаш я, цхьан моттига эггара дукхагӏа кхоачаргдар 1,5 миллион сом ахча да. Деррига хӏама чулоацаш, тохкам бергба проекташта. Коталонга кхача эггара кӏезигагӏа 40 балл хила еза. Хьадайтача каьхаташта тохкам беш хургба укх шерарча гуйран хьалхарча бетта 15-ча денгара 18-ча денга кхаччалца йолча хана, хӏаьта цу берригача балхах хиннар ховш хургда 2026-ча шерарча тов бетта 28-ча дийнахьа, котбаьннарашца бартчӏоагӏам оттабеш долча каьхаташта кулг яздар укх шерарча ардара бетта 14-гӏа ди оттале хургда», - йоах «Сердалога» Миннацера кхаьчача хоамо.
Белгалдечох, хӏара моттигагара «электоронни кулг яздаь» цхьа электронни пакет мара хила йиш яц. Дӏадахьийтачул тӏехьагӏа цхьаккха хӏама хувца, тоаде йиш хургьяц, бакъда каьхаташ чуийду болх бодача юкъа юхадерзаде йиш я уж. 2026-ча шера кӏимарса бетта 20-ча денгара маьцхали бетта 20-ча денга кхаччалца «Электронни бюджет»https://promote.budget.gov.ru/ порталага гӏолла чудала деза дехар, яхьашка дакъа лаца безам болчо.
