ГӏалгӀай мехка безбир «Седкъа» яхача дукха оагӀонаш долча инженерий олимпиаде котбаьннараш
Чуранаькъан Т.Х. цӀерагӀча Къилбаседа Кавказа доагора-энергетически колледже совгӀаташ луш дар «Седкъа» яхача дукха оагӀонаш долча инженерий олимпиаде котбаьннарашта, яхаш, дийцар «Сердало» газетага дешара, Ӏилман Министерстве.
«Карарча дешара шера, олимпиада доакъашхой хилар берригача мехка гӀолла 653 эзар саг. Хьаькъале яхьаш дӀагойтача ГӏалгӀайчено баьккхар дика толам. 76 дешархо хилар 1-ча даькъ тӀа, 230 - ӏӏ даькъ тӀа, иштта 298 - ӏӏӏ даькъ тӀа котбаьннараш.
Дика толам баккхарца бераш даькъаладийцар ГӏалгӀайчен дешара, Ӏилман министра Цхьорой Ахьмад-Башира, Чуранаькъан Т.Х. цӀерагӀча СКТЭК кулгалхочо Чуранаькъан Мустафас, иштта «Седкъа» яхача олимпиадан федеральни тӏахьожамхочо Болотина Юлияс. Цу кхетачен чудоагӀаш, министерствос уж бераш дешаш долча ишколай кулгалхошта сийлен грамоташ елар, олимпиаде цар лакха толамаш дахарах», - аьлар тхога хоам баьчо.
Россе итта дикагӀа йолча моттигашта чуйоагӀаш я Гӏалгӏайче «Седкъа» яхача инженерни олимпиадах. Цу толамо чӀоагӀдир начӀал долча кагирхошца цахадаш болх дӀахьош хилар. Республико тешшаме шийна тӀехьа чӀоагӀъю технически болхлой кийчбара цӀи. Моттигерча дешара даькъ тӀа, цу тайпара начӀал долча берий таронаш йоаржаяра хьакхолл деррига эшаш дола хьалаш.
Цо новкъостал ду хургболча инженерашта, конструкторашта, тохкамхошта шоай профессега кхачара хьалхара тешшаме гӀа баккха. Котбаьннарашта, совгӀаташ даьхарашта лаьрххӀа йола таронаш лургья мехка хьалхале лелаеча вузашка деша отташ, цар хьаелл йоккхийча технологически компаней наӀараш.
