Пекинера кабуц кхее лаьрхӀа ба вайцига
«Шолже» яхача ахархой боахама шоллагӀа аргӀа дӀайолаяь хиларах, ГӏалгӀайчен юртбоахаме пекински оала кабуц кхеергья, яхаш, дийцар «Сердало» газетага мехка кулгалхочун зарбан болх лелабераша.
Кабуц йоацаш а, «Шолже» яхача ахархой боахаме моажаовлаш (морковь) кхедара болх а дӀаболабеш ба. Из болх дӀабахьа таро хул «Тихая» яха теплицан комплекса, электроподстанце гӀишлош хьалъяь яларах.
«Оаха лаьрхӀад, томаташ арахийца а ца Ӏеш, кхы а дукхагӀа баьцадаараш кхеде, цунца бахархошта тайп-тайпарча кердача баьцадаарашца Ӏалашо ергйолаш», - аьлар, ше къамаьл деш, ГӏалгӀайчен кулгалхочо Келаматанаькъан Махьмуд-Ӏаьлас.
Пекински оалаш йола кабуц массайолча хана наха эцаш а даара юкъе лелаеш а я, хӀана аьлча пайдане а я из. Цул совгӀа, кхеяра а атта я, дика хьа а хул. Цо таро хулийтаргья из кабуц кхычахьара хьакхухьаш дӀадодар воай мехка дита,цунца цхьана моттигерча фермерашта пайда а бахьаргба цо.
«Шолже» яха боахам ГӏалгӀайчен ахархой боахама проектех керттера лоархӀаш ба. Цо арахецаш бола кхача лоаттабу, ерригача Россе мах беш йолча моттигашка.
Пекински кабуц а иштта моажаовлаш а арахеца болабелча, «Шолже» цӀи йола боахам кхы а чӀоагӀагӀа лоархӀаме хургба ГӏалгӀайчен экономика дегӀайоалаяра, керда балха моттигаш хьакхоллара, мехка кхачан кхерамзленна Ӏалашо яра.
