Россе дзюдох йолча яхьашка котбаьннарий цӀераш яьхар
ГӀалгӀай Республикан физически культуран, спорта Министерствос цӀераш яьхар, дзюдох йолча Ерригроссийски яхьашка котбаьннарий. Уж дӀахьош яр 1981-1982 шерашка СССР шозза чемпион хиннача Пхьарчанаькъан Мухьмадах болча дагалоаттама.
«Жюре лаьрхӀача тайпара, МутаӀаланаькъан Адама, Могушканаькъан Акромата боарза совгӀаташ делар, уж 60 кг дозал дарашца латаш бар. Цу дозалах дото совгӀат даьккхар Албохчанаькъан Жабраила. Хьалхара моттиг яккха таро хилар дика латара говзал гойтарах Султиганаькъан Ислама, 60 кг дозал долаш, иштта Угурчанаькъан Рустама (90кг)», - аьлар ГӀалгӀайчен спорта Министерствон зарбан болх лелабеча ГӀаппархой Аишас.
Ерригроссийски яхьаш чакхйоалара хетаяь кхетаче хургья тахан сарахьа, «Магас» оалача спорта ЦӀагӀа, из республикан эггара йоккхагӀа йола спортивни майда я.
