Гӏалгӏай мехка ӏалашо ергья, промышленносто арахецача хӏамах нах лорабеш
ГӏР Паччахьалкхен Председатела Сластенин Владимира дакъа лаьцар промышленносто арахеца хӏама законах доацаш леладара духьала къовсам лоаттабеча Паччахьалкхен комиссе кхетачен юкъе, яхаш, дийцар «Сердало» газетага республикан министрий кабинете.
Кхетаче дӏайихьар ВКС кепе, РФ Паччахьалкхен Председатела хьалхарча гӏончас Мантуров Дениса кулгал а деш.
Цига Гӏалгӏайчен оагӏорахьара дакъа лоацаш хилар Паччахьалкхен Председатела гӏонча Кокурхой Адам, Гӏалгӏайче гӏолла йолча Росздравнадзора кулгалхо Боранаькъан Ахьмад, промышленнноста, таьрахьий дегӏаахара министра декхараш кхоачашдеш вола Татренаькъан Мухьмад, унахцӏенон министра гӏонча Угурчанаькъан Хади.
«Тахан дувцаш дола дош да тӏахьожама болх лерттӏа вӏашагӏболлар. Из вай бахархой кхерамзле, продукце дикал лоаттаяра деш да. Кхыча мехкий болхлой балха говзал а, цига къамаьл деш дийцар а юкъедоаладеш, из болх тоабе хьожаргда», - аьлар Сластенин Владимира, из болх лоархӏаме хилар белгалдеш.
Цига иштта дийцар, дӏадахача шера дикал йоаца лорий продукци юкъеяргйоацаш дӏабихьача тӏахьожама балхах, иштта Евразийски экономически союза мехкара йоацача цемента дикалга хьожаш хилар. Дӏахо дийцар гӏир йоаллаш йола хӏама бокъонах доацаш лелаяра хьалах.
