Эса тӏара хин гӏишло хьалъеча, тӏахьожам лоаттабергба
Эса тӏа хий хьалу моттиг хьалъеш латтача балхага хьажа ваха хилар вай мехкада Келаматанаькъан Махьмуд-ӏаьла. Из хоам «Сердалога» бир мехка Кулгалхочун зарбан болх лелабераша.
«Болх мишта дӏабодаш ба, малагӏча хана йистебала безаш ба дийцар оаха. 24 сахьата 100 эзар кубометр совгӏа низ, чӏоагӏа йола таханарча ханага хьежжа моттиг я хьалъеш латтар. Дӏоахал 90 км я, цу моттига шорал – 550 гектар. Лаьттанцара балхаш дӏахьош, кӏалхара кӏийле чӏоагӏъеш, хий леларгдола моттигаш йоахаш, кӏалха гӏолла дӏайохийташ боахк цига тахан», - белгалдир вай Мехкадас.
Хин хьал мишта хургда теркалдир цо, Роспотребнадзора тӏадиллар; проект чакхъяллалца цу гӏулакха тӏахьожам, терко лоаттаеш хила, аьнна. Мехкарча Минстроя, «РосСтройКонтроль» яхача оагӏонна тӏадиллад, къоастаяьча хана болх боаггӏача боараме йистебаьнна хургболаш, лакха тӏахьожам беш хила, аьнна.
Из проект РФ Президента Путин Владимира, мехка Паччахьалкхено гӏо деш дӏахьош я. Бахархошта боаггӏача боараме цӏена хий хургдолаш дӏахьош боккха болх ба из.
Келаматанаькъан Махьмуд-ӏаьлас белгалдир, хӏара бетта цига водаш, балхага хьожаш, ахча дохкара гӏулакх нийсача оагӏорахьа дӏадодаш дий тохкаш, хургва ше, аьнна. Ца доаггӏача тайпара рузкъа доадар чакхдоалийтаргдац ше, аьнна, белгалдир Мехкадас.
Региона кулгалхой хьожаш хургба болх боаггӏача боараме, ханнахьа чакхбаргболаш.
