Эзараш долча бераша дика салоӏаргда вайцига аьхки
3700 совгӏа дола бер ахкан хана салоӏаш хургда вай мехкарча лагерашка. Запорожски областера 100 бер а хургда царна юкъе. «Сердалога» из хоам бера мехкадаь зарбан болх лелаберашкара. «Берашта лоаттабеча кхачан йоккха терко ергья мехка.
Боаггӏача боараме, берий ханашка хьежжа даа хӏама лоаттадергда лагерашка. Лагере ха яккхар сакъердаме хиларал совгӏа, берашта пайда беш а хила деза. Цу балха тӏахьожам беш ва со тахан. Хӏара бер, къаьстта кердача моттигашкара кхаьчар, дог гӏоздаьнна, боаггӏача боараме салеӏа, пайда хургболча тайпара ха дӏайихьа хилара тӏехьа терко ергья мехка», - белгалдир Келаматанаькъан Махьмуд-ӏаьлас.
Спорта оагӏонцарча яхьашка дакъа лоацаш, шоай начӏал, говзал гойташ, дешара, культуран кхетаченашта юкъе долаш, ма хетта салоӏаргда бераша. Хӏара берий лагере федеральни программацара тематически сменаш хургья, берий кхетам нийсбеш.
Программан юкъе я «Хьалхарбарий болам», «Россе аьрзелгаш» яха проекташ. Къаьстта йоккха терко ергья СВО доакъашхой, иштта боккхача дезалерча, таро дика йоацача, могашал эшаеннача берашта.
Ишколерча 33 лагере салоӏаш хургда дукхагӏа дола бераш, 900 - «Аьрзи» лагере, 158 – Магӏалбикерча «Къона патриот» яхача стационарни лагере. 600 совгӏа цу оагӏонцара саг хургва берашца болх дӏахьош. Белгалде деза, тахан мехка берашта йоккха терко лоаттаелга.
