Дӏахойодача хана кхоачашде дезача керттерчарех дийцар мехка
Республикерча Кабмина доакъашхошца аргӏанара кхетаче дӏайихьар вай мехкадас Келаматанаькъан Махьмуд-ӏаьлас. Из хоам «Сердалога» бир Мехкадаь зарбан болх лелабераша.
«Керда гӏишлош хьалъярах, къаман проекташ йоаржаярах, 2027-ча шерарча лоархӏамеча гӏулакхашка кийчо ярах дийцар кхетаче. Цу юкъе да республикан 35 шу дизар а. Белгалде деза, дӏадахача 2025-ча шера мехка гӏишлошъяра балхашца, иштта кхыдолча оагӏонашца дикка толам хиннилга.
Бакъда дӏахо кхоачашде дезараш а кӏезига дац, деррига а боаггӏача боараме чакхдаккхара тӏехьа къахьега дезаш да вай», - белгалдир вай мехкадас Келаматанаькъан Махьмуд-ӏаьлас.
Дӏабихьача балха юкъе я республикан 35 шу дузача хана хьаелла езаш йола моттигаш. Цар чулоац культурацара, дешарцара, вахара оагӏонцара, иштта кхыйола проекташ.
Мехкадас теркалдир, ерригача моттигий болх йиллача хана, боаггӏача боараме чакхбаьккха хила безилга. Таханарча хано дӏадеххача тайпара, бахархошта паргӏато еш, беркате хила еза еррига моттигаш.
