Цаӏ волча ток лоаттадечун балхаца дувзаденнарех дийцар мехка
«Цаӏ волча хӏама лоаттадеча» ПАО хьалха латтача Лев Кузнецовца кхетаче дӏахьош хилар вай мехкада Келаматанаькъан Махьмуд-Ӏаьла. Вай мехка цу оагӏонца дувзаденнарех, цхьацца хӏаман тӏагӏолла тӏалаттарашца оттаеча чӏоагӏонца дӏахьоча балхах дийцар цу кхетаче. Ахкан ха юкъекхаьчача хана денз, вай мехка, иштта Даькъастен кхыйолча моттигашта ток лоаттаеш я из компани. Кхетаче хьаеллаш, вай мехкадас Келаматанаькъан Махьмуд-Ӏаьлас белгалдир дӏахо дикка тоадеш къахьега дезараш. Царех да тӏалаттарашца юридически оагӏонца чӏоагӏо оттаяр, муниципальни оагӏонцарча хьакимашцара бувзам чӏоагӏбар, деррига гӏулакхаш боаггӏача боараме меттадоаладар.
«Кердача оагӏон тӏа дӏатӏадалар лертӏа хила деза. Сона лоархӏаме да юкъарча боарама хьал довзарал совгӏа, бахархошца боаггӏаш бола болх дӏабихьа хилар, цох хьахиннар гуш хилар. Нагахьа, токах тӏалатта декхар дӏадала вахархочун хало дале, малагӏча моттиге, хьанна дӏатӏаваха веза ховш хила веза из. Массайолча цу оагӏонцарча моттигашта доагӏаш да из. Ток лоаттаечо, цох пайда эцачо массахана цхьана дӏакхахьа беза болх ба из»,- белгалдир вай мехкадас.
Лев Кузнецовс белгалдечох, компане вай мехкара моттиг боаггӏача боараме болх тоабаь я. Филиале болх беш 165 саг ва, карарча хана кхы болхло эшаш хӏама дац цига – ерригача моттигашка болхлой ба. Белгалде деза, кердача тоабан доакъашхой тока оагӏонца хьалхагӏа къахьийга, из гӏулакх дика довзаш болга. Цу оагӏон кулгалхочо белгалдир; эггара хьалхарча аргӏагӏа тӏалаттарех дар гулдеш хиннаб шоаш, аьнна. Ревизи дӏаяхьарах бархӏ эзар совгӏа нах дӏаязбир кхы а. Къаьнара, эшаш доацараш, бакъдоаца хоамаш шоай моттигера дӏадоахаш, деррига хила деззача тайпара меттаоттадеш къахьегаш ба цига. Иштта коммерчески лоархӏача, «бюджетни» моттигашцара хӏама тохкаш ба цу оагӏонца.
Из болх таьрахьашца дувзаденнараш юкъедоаладеш дӏабахьарца дикка хьалхадаьннад вай, «доалахьарча кабинетага» гӏолла болх лоаттабераш а хӏара денна дукхагӏа хулаш латтилга гуш да. Офисе беха ца безаш, шоай цӏагӏа баггӏашехь, наьха из болх дӏабахьа аьттув хургболаш къахьегаш ба тахан. Хувцамаш да кхыдарашка а – тӏалаттараш сов дукха хиларах керда кассаш хьаеллаш, мобильни пункташ хьакхоллаш, МФЦ цу балха юкъелоацаш къахьегаш ба тахан. Болх сихагӏа, дикагӏа дӏагӏоргболаш керда техника оттаеш ба.
Къаьстта терко еш дийцар кхетаче бахархошта цу оагӏонцара керда бокъонаш йовзийтарах. ЦУРе эггара дукхагӏа тӏалатташ дола лоткъамаш теркалдаь, цу оагӏонца дувзаденна кхоачамбоацараш меттадоаладеш къахьега дезилга белгалдир вай Мехкадас.
Ардара бутт болалуча хана, республике компане болх дӏаболабаь 100 ди хулача хана, хьаӏайна кхоачамбоацараш довзийташ, дӏахойодача хана кхоачашде дезараш белгалдеш, кхетаче дӏахьоргья.
