«Йоккхача Коталоно Кавказ вIашагIтох» яхача проектах дийцар вай мехка
Новоалександровски историко-мехктохкама музея кулгалхо, «Мобильни суртгойтам «Йоккхача Коталоно Кавказ вIашагIтох» яхача проекта автор волча Иванов Игораца кхетаче дIахьош хилар «Даьхен лорабой» яхача ганза мехкарча филиала хьалха латта Абаьданаькъан Ислам. Ганза регионерча филиале хилар вIашагIкхетар.
«Проектаца дувзаденнарех, кхоачашде лерхIарех дийцар кхетаче. Цу юкъе дар «Мобильни суртгойтам «Йоккхача Коталоно Кавказ вIашагIтох» яха Россе къаман цхьоагIон Шера, СВО турпалхошта хетаяь йола йоккха проект 2026-2027-ча шера Къилбаседа Кавказа мехкашкарча музейшка, культуран цIеношка йоаржаярах. Сийлахь-боккхача Даьймехка тIема, Украинерча тIема операцена хетадаь балхаш хургда цу юкъе.
Тхьоврарча ханашка денз, турпала толамашта юкъе дакъа лоацаш хьадаьхкача Къилбаседа Кавказа къамашта юкъера цIаккха а хада йиш йоаца бувзам хургба цох», - йоах «Сердалога» «Даьхен лорабой» яхача ганзера кхаьчача хоамо.
Иванов Игора белгалдечох, проект даьй турпала гIулакхех дола истори дийндеш, тIехьа тIабоагIарашта дукха хIама довзийташ, лоархIаме болх дIахьош я. «Даьхен лорабой» яхача ганза мехкарча филиала кулгал деча Абаьданаькъан Ислама, лакха мах оттабеш, тIаийцар из болх. Цо белгалдир, проект йоаржаяра гIулакхе, мехкарча моттигашка из гойтам дIахьош филиала гIо дергдолга.
