Спидах, кхыча дӀа-хьа доалача лазарех дийцар мехка
Могаш воацачунгара кхыча сага дӀатӀайоалаш йолча ВИЧ инфекцех дийцар, республике унахцӀенон гӀулакхех йолча Министерствон хьалха латтача Антошканаькъан Заремас кулгал деш дӀайихьача кхетаче. Цига дакъа лоацаш бар Роспотребнадзора, Росздравнадзора, ГӀалгӀайчен юкъарча палатан доакъашхой, иштта дарбанчешкара керттера лораш. Из хоам «Сердалога» бир министерствера.
Тахан вай республике цу лазарашцара хьал мишта латт, уж инфекцеш яржаргйоацаш малагӀа болх дӀакхахьа беза дийцар кхетаче Спида, кхыдолча инфекционни лазарашта духьала къовсам лоаттабеча оагӀон керттера лор йолча Бекмарзанаькъан Луизас, республикерча цӀекан-пхаьний диспансера кулгалхочун гӀонча йолча Малсаганаькъан Азас. Кхетаче дийцар дог тедеш дацар.
«Тахан вай дерригаш оарцагӀдаьнна, боккха болх дӀабахьа безаш хало я республике цу лазарашца эттар. СПИД, ИППП даржаш латт вай мехка.
ЧӀоагӀа теркам тӀабахийта безаш гӀулакх да латтар. Уж лазараш даржаргдоацаш къахьега деза вай, беррига низ тӀабахийта, могаш боацарашта деш дола дарба лакхача боараме хила деза», - белгалдир Антошканаькъан Заремас.
