Гӏалгӏай мехка дийцар, Эса тӏа хий чулацара гӏишло хьалъярах
Шолжа кхален администраце кхетаче дӏахьош дийцар, Оалкама Эса тӏа хий чулоаца моттиг хьалъеш хиларах.
«Гӏалгӏай Республикан Паччахьалкхен Председатела гӏончас Балахой Микаила кулгал а деш, Шолжа кхален депутатий совета кулгалхочо Йовлой Мухьмада дакъа а лоацаш, проект кхоачашъяра керттера хаттараш дийцар.
Кхетаче дӏахьош, доакъашхоша техкар хӏанз хьадеш латта гӏишлон балхаш, уж шоай ханнахьа чакхдахара дешаш. Из проект йоккхагӏчарех а, технологи лакха йолаш а я. Цунна чудоагӏаш да, Эса хин кӏалха цхьа километр хий чулоацаш йола моттиг хьалъяр, иштта 80 совгӏа километр дӏаьха хий чудиллар. Из болх баьчул тӏехьагӏа, республикан юрташка тешшаме хий лоаттаде таро хургья», – аьлар кхален администраце.
Из гӏишло лоархӏаме я ерригача республиканна, цо тӏахьех эггара доккхагӏа дола дешаш кхоачашдара – бахархошта молаш дола хий лоаттадара. Паччахьалкхен Кулгалхочо, Россе Паччахьалкхено хьаллацарах, из проект кхоачашъяра ахчанца новкъостал дир, тахан из кхоачашъеш, вахара юкъейоаккхаш я.
Белгалду, юкъеяьккха технологи бахьан долаш, гӏомара-жагӏанна юкъегӏолла хий чакхдоал, доазон тӏара экологически хьал толха а ца деш. Говзанчаша мах оттабарга диллача, Эса хий дукхача хьасташкара хьадоагӏача хил дикагӏа лоархӏаш да.
Карарча хана балхаш дӏахьош да цхьацца долча доакъош тӏа. Ахчанца ӏалашо яьй, эшаш мел йола хӏама йолаш я, гӏирсаш ийцад. Гӏишло хьалъяра болх ший графикага хьежжа дӏахьош ба.
