КӀалвисачунна хьалхара гӀо де, кердача хьисапе Ӏомабу нах
МоллагӀа хатар хиннача моттиге, кӀалвисачунна хьалхара гӀо де Ӏомабу бахархой унахцӀенон гӀулакхех йолча Министерство, паччахьалкхен университето, цхьана болх дӀахьош.
Из хоам «Сердалога» бир министерствон болхлоша.
УнахцӀенон гӀулакхех йолча Министерствон кулгалхочун гӀонча йолча Угурчанаькъан Хаде кулгал деш, дарбанчешкарча керттерча лораша, университета болхлоша дакъа лоацаш, дӀайихьача кхетаче дийцар цу гӀулакхах.
«Эггара хьалхара гӀо де бахархой Ӏомабарах, из гӀулакх мишта, малагӀча тайпара дӀадихьача дикагӀа хургда дийцар кхетаче. Соцам бир, цӀаьхха хатар хиннача оарцагӀъухарий моттиге инструктораш Ӏомабаь, цар дӀахо бахархошта хьехаргдолаш.
Республикерча бахархошта говзанчаша хьехаргда моллагӀа хатар хилча: цӀий ца соцача, воагаваьча, дог болх ца беш сецача - сага эггара хьалха малагӀа гӀо де деза. Къаьстта боккха теркм тӀабохийтаргба ха яхача наха, берашта гӀо дара.
Эггара хьалха лекцеш йолаш, тӀаккха балхаца деррига хьагойташ, цӀаьхха кхоачамбоацараш нийсделча фу де деза хьалхадоаккхаш, дӀахьоргда из гӀулакх», - дийцар министерствон болхлоша.
