«Со – инженер» яхача фестивале котбаьннараш хьакхайкабир
Гӏалгӏай мехка хьакхайкабир «Со - инженер» яхача республикански фестивале котбаьннараш, из вӏашагӏъеллаяр «Кванториум» яхача берий технопарко, таьрахьашца Магас дегӏаахара Академе, иштта «Шолже» яхача акционерий юкъарлоно.
Кхетаченна чудоагӏаш дар инженерни проекташ гойтилга - презентаци яр, яхьа мах а оттабеш. Иштта хьаьший бахар экспозици хьайийллача. 8-18 шераш даьнна 70 гаргга дешархо хьежар, шоашта фу хов мехка боараме дӏахьоча яхьашка.
Зӏамагӏа йолча тоабанца (8-10 шераш) котбаьннарех хилар Меданаькъан Мухьмад, Янданаькъан ӏаьла. Цар дика говзал гойтар «Проект чоалхане хилар», «Проект лораяр» яхача доакъош тӏа. Яхьий чаккхе еш, «Къахьегама моттигашца бувзам лелабар», «Проект кийчъяр» яхача даькъ тӏа котало яьккхар Жандаранаькъан Абубакара, Дахкилганаькъан Мухьмуда. Озанаькъан ӏаьла, Кхоартой Мухьаммад белгалбаьлар «Мдела болх» яхача даькъ тӏа.
11-13 шераш даьннача берашта юкъе хьалхара моттиг яьккхар Товтанаькъан Сафияс, Котанаькъан Сафияс.
Йоккхагӏа йолча тоба юкъе (14-18 шераш) дикагӏа йола инженерни проект хилар Албохчанаькъан Зубейра, Овшанаькъан Адама кхеллар.
«Программироване» даькъ тӏа толаш хилар Йовлой Мухьмад, Колой Тимур, Гарданаькъан Ратмир. Тоачанаькъан Азамат, Тебой Адам - уж белгалбаьлар «Шолже» агрокомплекса инженерни декхар дика кхоачашдарах, царна из бахьан долаш 1-ча лерхӏама диплом делар.
«Хьожачар безаман совгӏат» делар юкъерча тоаба чубоагӏача Албохчанаькъан Алима, Чопанаькъан Ибрахӏима, Малсаганаькъан Абдаллаха. 14-18 шераш даьннача дешархошта юкъе хьаьшашта безабелар Доврбиканаькъан Аьсет, Къоастой Халит.
«Со - инженер» яха фестиваль лоархӏаме майда хилар Гӏалгӏай Республикан инженерни даькъ тӏа толамаш гойтара, иштта дешара, къахьегама, юкъарлон моттигашца бувзам лелабара», - аьлар «Кванториум» яхача республикерча берий технопарка кулгалхочо Янданаькъан Салмана.
