Тӏема аренашка лозаваьча СВО бӏухочун гӏо дергда мехка
Тӏема аренашка геттара лозабаь болча бӏухошта гӏо деш, цар хьал аттачахьа доаккхаш ба мехка. Ветеран Овшанаькъан Татархан волча ваха хилар «Даьхен лорабой» яхача ганза мехкарча филиала болхло Темарханаькъан Ӏийса. Тӏема аренашка декхараш кхоачашдеш латташ, мина ийккха шаккха ког боацаш висав бӏухо. Госпитале ха йоаккхаш хинна, цӏакхаьчача Тархана гӏо эш.
«Ветерана хьал, иштта цун цӏен хьал тохкаш, хилар филиала болхлой. Бӏухочун, иштта цун дезала хьашташ кхоачашдара тӏехьа къахьегар керттерчарех да. СВО ветерана йиӏиг ишколе дӏаоттаяра гӏулакх цу моттиге къоастадир цар. Татархана хьал теркалдеш, цунна аттагӏа, паргӏатагӏа хургдолча тайпара хувцамаш де деза цун цӏагӏа, лаьрххӏа къоастаяьча программага гӏолла», - йоах «Сердалога» филиалера кхаьчача хоамо.
Иштта хало текхачул тӏехьагӏа, дӏахо ший вахар дӏадахьа ӏомавала атта дац бӏухочунна. Цу халонашца цхьаь хургвац из, массахана цунца бувзаме болаш, эшар ӏалашдеш, хьашташ кхоачашдеш хургба филиале. Ший цӏагӏара вахар ма хулла цуннна аттача даккха хьожаш, къахьегаргда дӏахо.
