Сага бокъонех вола викал, Избиркома кулгалхо хоржамий балхах дувца вӏашагӏкхийтар
Сага бокъонех вола викал Цӏечой Ибрахӏим, мехкарча Хоржамий комиссе кулгалхо Йовлой Муса кхетаче дӏахьош хилар. Республике кхаь дийнахьа лаьттача РФ Паччахьалкхен Думан, мехкарча Халкъа Гуллама хоржамех дийцар хьакимаша.
«Сердалога» бенача хоамах, хоржамашка кхадж тасса хьаухаш хиннача наьха бокъонаш боаггӏача боараме лораяра балхах дийцар цига. Мехкарча хоржама моттигашка цу гӏулакха тӏахьожам беш лаьрххӏа оттабаь нах бар.
Хьакимаша теркалдир деррига: дегӏа могашал эшаенна болча, ха яхача нахаца из болх мишта чакхбаьккхаб, хӏара хоржамхочун бокъонаш боаггӏача боараме лораяр мишта хиннад.
Дӏахойодача хана, вӏаший бувзам лоаттабеш, терко е еза лоархӏамедараш белгалдир Цӏечой Ибрахӏима, Йовлой Мусас. Мехкарча сага бокъонех волча викалá, Избиркомá юкъе массахана бувзам хилар, республикерча бахархой бокъонаш лораяра тӏехьа лоархӏаме моттиг дӏалоацаш да.
