Доалахьара боахам дикагӀа лелабераш белгалбир
Карарча шера доалахьара боахам лелабераш белагалбеш, диазлагӀа дӀахьош бола болх чакхбаьлар. Булгалбаьлар котбаьннараш, яхаш, дийцар «Сердало» газетага ГӀалгӀай Республикан юртбоахама Министерстве.
Республикан Кулгалхочо могаяь из проект хӀара шера къахьегамхошта юкъе яржаш йоагӀа, цул совгӀа цу юкъе дакъа лаца безам бараш а совбоалаш боагӀа.
Цудухьа из болх вӀашагӀболлараша ма хулла дукхагӀа нах чулоац цу юкъе. Карарча шера цу яхье дакъа лаца безам болаш хьачуделар 570 дехар. Дала оттадаь ахча 3 млн сом дар.
«Хьалхара моттиг яьккхар ЖӀайрахьа кхален яхархочо Харсенаькъан Радимхана. Цунна кхаьчар 500 эзар сом. ШоллагӀа моттиг яьккхар Наьсарен кхален ТӀой-Юртарча Шибиланаькъан Золотхана, иштта Шолжа кхален Илдарха-ГӀалий ТӀарча Ногайнаькъан Мадинас. Царех хӀаранена 300 эзар сом делар. КхоалагӀа моттиг Наьсарен кхален Эккажкъонгий-Юртарча Антошканаькъан Румияйна, Шолжа шахьарерча Овшанаькъан Ларисайна кхаьчар. Царна делар хӀаранена 200 эзар сом.
Юхейисача 20 доакъашхочоа лургда 100 эзар, 50 эзар сом.
Чаккхе еш дӀалоархӀаш хиннар дар: тайп-тайпара хьайбаш леладеш хилар, кхыйола культураш лелаяр, малагӀча хьалашка даькъ тӀара болх лелабу дӀахо боахам дегӀабоалабара», - цу тайпара хоам бир республикан юртбоахам лелабераша.
