24 гӏишлон тӏа къахьегаргдола гӏишлонхой хоржаш ба мехка
24 гӏишло хьалъеш, дикка тоаеш болх дӏахьоргбола цу оагӏонцара моттигаш къоастаеш, яхьаш я мехка кхайкаяь. Из хоам «Сердалога» бир гӏишлон балхех йолча министерствера.
«Къаман проекташка г1олла 27 г1ишлон балхаш чакхдоахаргдарашца чӏоагӏо оттае езаш ба министерстве. Таханарча дийнахьа царех 24 гӏишлон гӏулакхех мехкарча Госзаказа Комитете дехар чуденнад, электронни оагӏонца яхьаш кхайкаяьй», - дийцар тха газетага.
18 гӏишлох чӏоагӏо оттаяьй, 6 гӏишлонцара болх кулг язде дезаш ба, юхейисача 3 гӏишлон болх чакхбаккха кийчо еш ба.
Эггара лоархӏамегӏа йола моттиг – дукха ца говш хьалъе йолае еза, из я краеведенех йола республикански музей. Иштта боккха болх дӏахьош тоаергья Магасера «Фаьлг» яха № 1 берий беш, Маг1албикера № 2 «Бӏы» яха берий беш, Гӏажарий-Юртара «Села1ад» яха ясли-беш, Жӏайрахьара «Золушка» яха берий беш.
Гӏишлош хьалъеш болх дӏаболабергба укх деношка Пхьилекъонгий-Юрта, Гӏажарий-Юрта, Галашка, Магӏалбике. Иштта Магӏалбикера Чахкенаькъан Саӏида цӏерах йола №1 гимнази тоаеш болх дӏахьоргба.
Хин турбаш хувцаргья Заьзгакъонгий-Юрта, Южне, Махьмад-Хи тӏа, Аьккхий-Юрта, Юкъерча Ачалкхе, Дола-Коа, Инаркъе.
Укх шера массехк къаман проектага гӏолла вай мехка 37 гӏишло хьалъеш, тоаеш болх дӏахьоргба, цу гӏулакха къоастадаь ахча – 6,4 млрд сом.
