Могашал тоае новкъостал дир СВО бейнача бӏухой даьна
«Даьхен лорабой» Паччахьалкхен ганза Гӏалгӏайчен моттигерча филиала дӏахо болх дӏахьу, бейнача бӏухой дезалашта новкъостал деш. Иштта, аргӏанара новкъостал дир Леймой Хьамзата Салмана дарба де. Из ва тӏема декхар кхоачашдеш шоай вахар тӏем тӏа ӏодиллача шин бӏухочун да.
«Хьалхагӏа Леймой Салмана кхайкарал дир Магӏалбик-Шахьара ганза вахарца дувзаденнача дешаех волча координаторга Коазой Хьамидага, санаторно-курортни е Жӏайрахьа кхален дарбанче ший могашал тоае вахийтар дехаш.
Боахамашта юкъера бувзам дика вӏашагӏбелла хилар бахьан долаш, цун дехар сиха кхоачашде таро хилар», - аьлар «Сердало» газетага «Даьхен лорабой» ганзе.
Карарча хана из ва, могашал меттаоттаяра курс дӏахьош. Цо яхачох дарба деча моттиге деррига хьалаш долаш да, даарца кхоачам ба, хӏаьта болхлой а лораш а терко дика еш ба. Коазой Хьамида ма аллара, бейнача бӏухой даьй йоакхо яр къаьстта тӏахьожам болаш да.
Ганза болхлочо цахаддаш бувзам лелабу Леймой Салманаца, иштта Жӏайрахьа кхален дарбанчен лорашца.
