«Гӏалгӏай - Российски авиаце истореца» яха гойтам хьабийллар мехка
Российски авиаце белгалбаьннача вай къаман къонгашта хетабаь гойтам хьабийллар мехкахбаьхача наьха Мемориале. Сигаленна шоай вахар хетадаь хиннача цӏихезача гӏалгӏай лётчикий вахара наькъаш довза аьттув ба цига. Россе авиаце хӏама тоадеш лаьттача деналах, майралах бизза хиннача вай къаман къонгех дувца дукха да.
«Сердалога» беча хоамах, цу гойтаме дакъа лацар лоархӏаме да къаьстта къонача тӏехьенна. Сигаленца доттагӏал чӏоагӏдаь, шоай декхараш лакхача боараме кхоачашдеш лаьттача гӏалгӏай къонгий къахьегама, вахара наькъаш малагӏча гӏулакхех лаьттад ховргда царна.
Гойтаме лоархӏаме моттиг дӏалоацаш ва Къилбаседа Кавказа къамашта юкъера эггара хьалхара лётчик ӏоахарганаькъан Чхьагӏа Рашид-Бек. Паччахьа эскара штабс-капитан волаш дӏаволавенна, советски авиаце тешаме лётчик хинна дӏаэттав из.
Иштта доккхача дешаца хьоахаве везарех ва РФ Турпал Оздой Ахьмада Мурад. Сийлахь-боккха Даьймехка тӏом латтача хана, сигалара фашист вохавеш, лакха майрал гойташ, лаьтта саг ва из. Белгалде деза, ишттача гойтаме дакъа лоацаш хиларо мехкахошта къаман цӏи дикача оагӏорахьара дӏайовзийташ лаьттача; яхь, денал долаш шоай декхараш кхоачашдеш хиннача къонгий цӏераш йовзийт. Вай массане лархӏа безаш, цар цӏераш йовза езаш нах ба уж.
Шерра бовзаш ба вай мехка авиаце охлой хинна Осканаькъан Сулумбик, Малсаганаькъан Ахьмад, Къоастой Ширвани уж кхоккхе турапала цӏерца белгалваьккхав Россе. Сийлахь-боккхача тӏема юкъе шоай къаман сий даьккхарех ва подполковник Лаьнанаькъан Мадак, лейтенанташ Ӏарчакханаькъан Хасолта, Ӏарчакханаькъан Мухьмад, кхыбараш.
