Республике хьабийллар ӏилманхочунна Тенканаькъан Висан-Гирена хетабаь гойтам
Гӏалгӏай къам мехкахдаккхара дагалоаттама Мемориале хьабийллар суртий-каьхатий «Гӏалгӏайчен исторически тӏехьале: Тенканаькъан Висан-Гири» яха гойтам. Из хетабаь ба ӏилманхочун-историка 85 шу дизара.
«Кердача гойтама проекто бахархошта бовзийт Висан-Гирена карагӏдаьннараш дувцаш бола цун вахара никъ. Из вовзаш ва дика лоархӏаш вола тохкамхо, хьехархо, гӏалгӏай къаман дӏаяхача ханашка хиннар меттаоттадеш къахьегаш хьавоагӏа саг, лакхара дарж дола эпсар санна.
Цун деррига ӏилман балхаш хетадаь да республикан культуран-исторически мах бола хьал довзара», - аьлар «Сердало» газетага гойтам кийчбаьраша.
Укхаза наха гургда ӏилманхочо дукхача шерашка гулдаь Гӏалгӏайчен дӏаяхача ханашка хинна вахар гойта тешалаш. Ужаш да наггахьа мара нийслуш доаца сурташ, каьхаташ, иштта автора ӏилман балхаш. Гойтам хургба кӏимарса бетта 23-ча денга кхаччалца.
