«Амозонкай лар» яха гойтам ба вай мехка хьабеллаш
«Амазонкай лар» яха гойтам ба кхоана мехкарча Малсаганаькъан Тухана цӏерах йолча музее хьабеллаш. Гӏалгӏай къаман къаьнарча истореца, цу ханашка цӏихеза хиннача кхалнахаца ювзаенна проект я болх дӏаболабер. Царех лаьца дукха яздаьд тхьоврача ханашка а. Из деррига довза аьттув ба гойтаме хьавеначун.
«Бакъдолча исторех, таханара кердадараш юкъелоацаш, вӏашагӏбелла ба из болх. Музея ганзера археологически, этнографически хӏамаш; иштта аьшках, дахчах, кхерах тамашийна дола балхаш хьакхолла говзал йолча Имагожанаькъан Ахьмада хьаяь хӏамаш оттаергья гойтаме хьокха», - йоах тхога тахан проекта хьалха латтарашкара бенача хоамо.
Къаьнарча хӏамашка, къаман гӏарчожка, исбахьален оагӏонцарча балхашка гӏолла вай культура, ӏадаташ, истори довзийтаргда гойтам вӏашагӏбеллараша. Кавказски амазонкех дола истори доаржадеш болх хургба цох.
Къаьстта лоархӏаме моттиг дӏалоацаш я гойтаме гӏалай юрташка баьхача вай ноаноша, йижараша лелаяь курхьарс. Гӏалгӏай къаман кхалсага моттиг, гӏулакхаш довзийташ бола гӏирс хиннаб из тхьоврача хана.
