Гӏирма, Севастополь Россех хьакхетар дездеш ба вай мехка
Гӏирма, Севастополь Россех хьакхетар дездеш ба вай мехка. Вай мехкадас Келаматанаькъан Махьмуд-ӏаьлас нийсхо оттаяра тӏехьа лоархӏаме хӏама да из, аьнна, белгалдир. «Сердалога» из хоам бера Мехкадаь зарбан болх лелаберашкара.
«2014-ча шерара тушола бетта 18-гӏа ди таханарча Россе исторе лоархӏаме, истореца ӏодужаш хилар. Гӏирман, Севастопола бахархоша цу дийнахьа чӏоагӏо йир шоай исторически Даьхенца хила. Вай боккхача мехка низ, цхьанкхетар белгалдеш гӏулакх хилар цох. Гӏирма Россех хьакхетар нийсхонга диллача боагӏаш баьккха гӏа бар.
Дерригача дунен бӏаргадайра Росси низ болаш, ший истори лоархӏаш, доалахьарча хӏаман доал де ховш, ший истори дика довзаш, цхьаннега а из кегадайтаргдоацаш мохк болга», - йоах къамаьла юкъе. Вай Мехкадас иштта белгалдир, тахан Гӏирме, Севастополе йоккхий, лоархӏаме проекташ йоаржаеш, экономически хьал меттадоаладеш, ший моттигашка ма хулла дукхагӏа туристаш тӏалаттаргболаш къахьегаш болга.
«Из ах гӏайре селханарча исторега диллача а Россецара оагӏув хиннаб, хӏама тоадара тӏехьа кердача новкъа майрра гӏа боаккхаш хургба тахан Россех хьакхийттараш. Укх лоархӏамеча денца иразе, аьттонца, беркатаца, вӏаший барт, цхьоагӏо йолаш баха даькъалабувц аз вай боккхача мехка бахархой! Россе хӏама лорадеш, нийсача наькъ тӏа тоадара тӏехьа къахьегаш дӏадаха низ хилба вай массане», - белгалдир вай Мехкадас.
