ГӀалгӀайче белгалбир экономиках бола ерригроссийски чемпионата лауреаташ
ГӀалгӀай Республикан дешара, Ӏилман министра Цхьорой Ахьмад-Башира белгалбир Илдарха-ГӀалан №3 йолча ишкола дешархой Сийлен грамоташца, цар дика дакъа лаьцар дукха ха йоацаш экономиках, доалахьара хӀама хьадарах дӀайихьача ерригроссийски кейс-чемпионате. Из хоам газетага бир ГӀалгӀай Республикан Ӏилман, дешара Министерствос.
Уж яхьаш дӀаяхьара дешархой кийчбеш хиннача хьехархошта а елар ГӀалгӀай Республикан дешара, Ӏилман Министерствон сийлен грамоташ.
Къаьстта белагалвир, хьалхара моттиг яьккха 10-ча классера дешархо Ноакастхой ИбрахӀим.
Белгалду, 2024 шера оагӀой бетта 6-ча денгара 9-ча денга кхаччалца, ерригроссийски кейс-чемпионата тӀеххьара дакъа дар дӀахьош. Цига енаяр Россе тайп-тайпарча миӀингашкара 121 тоаба. Вай республикера Илдарха-ГӀалан №3 йолча ишкола тоаба а яр цига.
«Бераша лакха боарам гойтар, цига шоаш оттаяьча проектага гӀолла, иштта уж дика тӀаийцар кхелахоша а», - аьлар министерстве.
