Судá жоп лургда еннача ший сесага пенси хьаийдаьча маӏача сага
Гӏалгӏайчен полице тахка даьлар Вахара ганза ахча лечкъадарца дувзаденна гӏулакх. Бехкевеш ва 55 шу даьнна моттигера вахархо, кастлуш цун гӏулакха чаккхе ергья судо, яхаш, дийцар «Сердало» газетага моттигерча МВД зарбан болх лелабераша.
«Тохкама болх дӏахьочар яхачох, 2023 шера ардара бетта ший фусам-нана енначул тӏехьагӏа, из ӏаьдалахкъайла а дихьа, цун телефона тӏара банка приложени лелаеш хиннав из. Цу сага, енначул тӏехьагӏа а ший фусам-наьна карта тӏа хьатӏадоагӏаш хинна заӏапхо хиларах луш дола страховой пенси ший карта тӏа доаккхаш хиннад, цул тӏехьагӏа банкомате гӏолла из ӏо а даьккхе, ший гӏулакхаш деш хиннад цу ахчах. 2023 шера ардара беттагара 2026 шера аьтинга беттага кхаччалца, цо ийцад 1,3 миллион совгӏа ахча», - аьлар тхоца къамаьл даьчо.
Цу гӏулакха тӏехьа тӏадам оттабергба хӏанз судо. Из деррига гӏулакх тахка дезаш да. Нагахьа санна из саг бехке волаш дале, цунна набахтен ха тохаргья.
