ГӀалгӀайче БоргӀа каш тоаде лерхӀ
БоргӀа каш яха къубба я Наьсарен кхален Пхьилекъонгий-Юрта, ГӀалгӀайче меттел, Къилбаседа Кавказе а къаьнагӀчарех лоархӀаш бусалба наьха сийленг да из. Укх деношка, из къубба малагӀча хьале я хара, цига вахар ЖӀайрахьа-Эса-ЧӀожерча музея-заповедника кулгалхо Сампенаькъан А., иштта «Казыят» яхача дикача гӀулакхий ганза кулгалхо, Россерча бусалба наьха Дин урхаллен викал Акказиев Р., яхаш, дийцар «Сердало» газетага музее-заповеднике.
Къубба кӀайча кхерах хьалъяьча гӀишлонна тара я, йӀоахал 5,5 метр, шорал - 4 метр, лакхал 3,2 метр я из гӀишло. Йиъсаьна кӀийле а, ах герга бухь а ба цун. Малхбоален оагӀорахьара ира арка я, лакха йоацаш чувоала моттиг я, цу тӀа лакхе улл Ӏарбий меттала йоазув тӀадола кхоъ бетонах яь Ӏоакъа. Цар беча хоамах, къубба яьй 808 шера, хиджра ханага диллача (из нийслу аьттинга бетта 29 дийнахьа 1405-ча - аьттинга бетта 17 дийнахьа 1406 шерашка). Цига дӀавелла воалл «Худайнада воӀ Бек-Солта».
БоргӀа каш ерригроссийски культуран, исторе лоархӀам болаш сийленг да, из лорадеш да паччахьалкхено. Тайп-тайпарча ханашка из тохкаш хиннав Л. П. Семенов, И. П. Щеблыкин, Л.И. Лавров»,-аьлар «Сердало» газетага яьссача ара латтача къубба тӀа даьча йоазоно.
Цу къаьнарча культуран гӀишлонга хьежачул тӀехьагӀа, Акказиев Рашида аьлар, ше из лорадара моллагӀа дола новкъостал де кийча ва, аьнна.
