Йоалах болча оагӏон болхло бехктокхаме озаш ва кхаъ эцарах
Вай мехкарча йоалах болча Федеральни оагӏон болхло бехктокхаме озаш, гӏулакх да хьадийлла. Республикерча Россе Тохкама Комитета къаьстта лоархӏамеча гӏулакхех болча тохкама оагӏон болхлой ба болх дӏахьораш. РФ УК 2-ча даькъа 290 ст. бехктокхаме озаш ва тахан йоалах болча оагӏонцара инспектор (боккхача боарамах кхаъ эцар).
«Тохкама болхлоша тахан белгалдечох, республикерча бизнес лелаеча сагагара 50 000 эзар сом кхаъ лаьрхӏа ахча хьаийцад цо, бокъо йоацача тайпара цо дӏахьоча гӏулакха цхьаккха тайпара духьале цаярах. Мехкарча Россе УФСБ болхлошта гучадаьннад из хӏама», - дийцар «Сердалога» мехкарча Тохкама Комитета къахьегамхоша.
Гӏалатваьнна болхло ӏаьдало дӏалаьцав, цунна духьала гӏулакх хьадийлла къахьегаш ба. Деррига а ма дарра тохкаш, дӏахо болх дӏахьош хургба тохкама оагӏонца.