Гӏалгӏай мехка ЕГЭ дӏалуш 24 дешархочо лакхара балл баьккхар
Карарча шера цаӏ йола паччахьалкхен экзамен дӏалуш, Гӏалгӏайчен ишкол яьккхараша гойтар шоаш тӏехьарча хана дика кийчо яь хилар. Лакхара мах бир(100 балл) 24 дешархочунна ховш долча хӏаман, цо тешал ду, хьалха хинначул кхозза дукхагӏа дешара даькъ тӏа уж дегӏабаьхка хилара. Из 100 балл бола толам дӏадахача 2025 шера цхьайттлагӏча классе 9 дешархочо мара гойтанзар, хӏаьта 2024 шера уж 11 саг дукхагӏа вар.
«Хьалхарча аргӏагӏа из вай бераша, цар даьша-ноаноша, хьехархоша дика къахьегарах да. Цар хӏара дешархочун дӏалу шоашта ховш мел дар. Доккхал ду аз вай дешархоех. Тахан Гӏалгӏайчен выпускникаша иштта дика толамаш гойтар, мехка кхыча хьалхале лелаеча моттигий дешархошта нийсса хилар доаккхал де йиш йолаш да. 100 балл баьккхар вай дешархоша укх ӏилмаех: истори, хими, биологи, эрсий мотт, литература, информатика. Къаьстта дика хет дика толамаш даьха хилар йоккхача шахьара ишколашка меттел, республикан доал деча даькъ тӏарча дешара моттигашка а. Дукхагӏа йолча предметех дола юкъера баллаш дегӏадоагӏаш да. Карарча шера эрсий метта юкъера толам 52 балл хилар, математиках - 60, физиках-57, биологех-62, ингалсий меттах - 56, информатиках-50»,- аьлар ший телеграм-канале Гӏалгӏайчен кулгалхочо Келаматанаькъан Махьмуд-ӏаьлас.
Гӏалгӏайчен дешара хьал кердадаккхар укх тӏехьарча шерашка мохк дегӏабоалабара керте латтача декхарех да. Цу юкъа республике юкъейоалаяьй 50 совгӏа хьалхале лелаю дешара моттиг, цо таро елар эзараш долча берашта дешара хьалаш тоаде.
Керттерча толамех цаӏ хилар, шин сменах болх беш йола ишколаш кӏезигагӏа хургйолаш къахьегар. Республикан кулгалхоша шоашта хьалхашка декхар оттаду 2030 шера еррига шин сменах болх беш йола ишколаш дӏаяха, беррига дешархой цхьан сменах дешаш хилийта.
Таханарча заман ишколаш дукха ха я дикача хьалашка яьнна. Тахан уж я сийрда, дукха хӏама чулоацаш йолча технологеех, гӏирсех пайда эца моттигаш. Укхаза дешарапл совгӏа, саг масса оагӏорахьара дегӏавоагӏа программа ӏомаю - берий таро я спортаца бувзам лелабе, кхоллама таронаш хьаелла, шоай начӏал гойта.
